UNITATEAREN DESKRIBAPENA:

Altzan industria iraultzak berebiziko garrantzia izan du. Altzako egituran aldaketak eragin zituen, biztanleen bizimoduan eta lanetan aldaketak eragin zituen eta gainera Altza donostiako biztanle kopuru gehiena duen auzoa izatea eragin zuen. Industriek Altzako itxura eraldatu dute eta gaur egun ezagutzen dugun auzoa sortzen lagundu dute. Industriek ekonomia eta lan kopuru aldetik abantaila asko ekarri zituzten, hala ere, lan baldintzak ez ziren hoberenak eta industrien kutsadurak ere kalteak ekarri ditu auzora.

Hau guztia dela eta, ezinbestekoa da industria iraultza eskolan lantzea eta auzoan izan zituen eragin zuzenak aztertzea. Goazen industria eta bertan lan egin zuten bizilagunen munduan murgiltzera eta ikastera.

Unitate honetan ikasleen aurre ezagutza eta esperientzietatik abiatuz, auzoko industriaren historian murgilduz, auzokideen kontakizunak entzunez, gelakideekin jakintzak partekatuz eta elkarrekin informazioa debatituz erronka nagusi bat gauzatuko dute. Erronka unitateko ataza ezberdinetan landu dutena ulertzea eta material edo produktu baten ekoizpenaren prozesua ikertu, ulertu eta idaztea izango da. Ondoren, prozesua gelakideen aurrean aurkezteko. Horretarako beharrezkoak izango diren oinarri guztiak ataza ezberdinetan aurkituko dituzte, pixkanaka hausnartuz eta erronka nagusira hurbilduz.

Nahiz eta industriaren gaiaren edukiak landuko diren, helburua ez da eduki horiek barneratzea izango, ikasleek norbere ezagutzak partekatzea eta elkarrekin kolektiboki eraikitzea izango baita garrantzitsuena. Izan ere, ezagutzak elkarlotuz, informanzio berria ulertuz, kideekin partekatuz eta debatituz historia guztion artean eraikitzea da unitatearen helburu nagusia.

Diziplinarteko izaera duenez ikasgai ezberdinetan landu daiteke unitatea, hala nola, ikerketa, euskara, natur zientziak, gizarte zientziak, balio sozial eta zibikoak edo IKT. 

OINARRIZKO KONPETENTZIAK:

Orokorrak:

• Ekimenerako eta espiritu ekintzailerako konpetentzia
• Ikasteko eta pentsatzeko konpetentzia
• Hitzezko, hitzik gabeko komunikaziorako eta komunikazio digitalerako konpetentzia

Espezifikoak:

• Planifikatutako ekintzak gauzatzea eta, beharrezkoa baldin bada, haiek doitzea.
• Informazioa ulertzea, buruz ikastea, eta ulertutakoa adieraztea (pentsamendu analitikoa)
• Informazioa interpretatzea eta ebaluatzea (pentsamendu kritikoa).
  
• Ideiak sortzea eta hautatzea (pentsamendu sortzailea).
  
• Baliabide kognitiboen erabilera estrategikoa egitea, ikasitakoa baliatuz eta beste egoera batzuetara transferituz.
• Hitzezko komunikazioa: hainbat hizkuntzatako askotariko testuak ahoz eta idatziz ulertzea eta jarioz, autonomiaz, sormenez eta eraginkortasunez erabiltzea.

DIZIPLINETAKO BARNEKO KONPETENTZIAK:

Orokorrak:

• • Zientzietarako konpetentzia
  • Konpetentzia sozial eta zibikoa
  • Hizkuntza- eta literatura-komunikaziorako konpetentzia

Espezifikoak:

• Zientzia-jakintzak egoki erabilita eta arduraz, autonomiaz eta ikuspegi kritikoz hartzea natura-ingurunearen gaineko erabakiak eta giza jarduerek ingurune horretan eragiten dituzten aldaketei buruzkoak, eta bizitzako esparru eta egoera guztietan jardutea gisa horretan, norberaren eta gizartearen bizitza hobetzeko eta ingurunea zaindu eta hobetzeko.
• Norberaren gizartea ezagutzea, eta bereziki haren iraganeko eta egungo eraketa, antolamendua eta funtzionamendua; gizartea zer lurraldetan eta nola ezarrita dagoen jakitea, haren iraganaren kontzientzia hartzea eta gizakien ekintzak gizartean sortzen dituen arazoen aurrean modu positiboan jarduteko gaitasuna lantzea.
  
• Bizi duen inguruneaz jabetzen den herritarra izatea eta egoera hori onartzea, konpromisoa izanda eta elkartasuna adierazita; aintzat hartzea garaiko gizarteetako aniztasun soziala eta kulturala, eta, bereziki, egungo euskal gizartekoa, eta naturarekin, bere buruarekin eta gainerako pertsonekin harremanetan jartzeko era berrien bila aritzea, gizartea hobetu eta jasangarri bihurtzeko.
• Hainbat esparrutako hitzezko, idatzizko eta ikus-entzunezko testuak, analogikoak zein digitalak, ulertzea eta jarrera kritikoz balioestea, xede edo helburu pertsonalak, sozialak edo akademikoak erdiesteko.
  
• Esparru pertsonal, sozial edo akademikoen berezko hitzezko, idatzizko eta ikusentzunezko testuak sortzea, eraginkortasunez erantzuteko askotariko komunikazio-beharrizanei. 
  

Ebaluazio irizpidea orokorrak:

• Ezaugarri bereizgarriak dituzten gizarte- eta kultura-taldeetako kide dela ohartzen da eta balioesten du, norberaren kultura-ezaugarri bereizgarriak eta beste talde batzuekiko desberdintasunak aintzat hartzen ditu, eta gainerako identitate, kultura eta herriekiko errespetua du eta giza eskubideak errespetatzea ezinbestekoa delaz ohartzen da.
• Gizakiak ingurune fisikoan eta gizarte-ingurunean dituen esku-hartzeen zenbait adibide ikusten eta kritikoki aztertzen ditu, iraunkortasunaren ikuspegitik, eguneroko bizitzan ingurumena eta ondare historikoa eta kulturala babesteko, berreskuratzeko eta kontserbatzeko jarrera izateko.
• Natura-ingurunean agerian jartzen diren ezaugarriei eta erlazioei erreparatzen die, haiei buruzko galderak egiten, identifikatzen, sailkatzen eta azaltzen ditu, horretarako askotariko ikerketa-materiala erabiliz, natura-ingurunea ulertzen du eta Lur planeta babesteak eta errespetatzeak gure bizitzarako nahiz etorkizuneko belaunaldientzat duen garrantziaz jabetzen da.
• Norberaren ezagutzan sakontzen du, lorpenak erdiesteko motibazioa sustatzen duten estrategien bidez, eta nork bere pentsamena eta ikaskuntza-estiloak erregulatzen ditu, natura-inguruneko arazoei eta pertsonen bizitzarekin duten erlazioari buruzko erabakiak modu arduratsuan, autonomoan eta kritikoan hartuz.
  
• Hizkuntzaren zenbait erabilera-eremutan sortutako ahozko, idatzizko eta ikusentzunezko diskurtsoak ulertzen eta interpretatzen ditu, zenbait motatako komunikazioegoerei aurre egiteko.
• Norberaren esperientziatik gertueneko esparruetan eraginkortasunez, errespetuz etaelkarrekin lan egiteko gogoz bai ahoz eta bai idatziz komunikatzeko gai da, unean uneko komunikazio-premiei behar bezala erantzuteko.

Unitatea ebaluatzeko irizpide zehatzak:

• Ikaslea gelakideekin taldekatze txiki eta handietan ezagutzak, iritziak eta bizipenak partekatu ditu.
• Gelako debatean parte hartu du, inguruko jendearekin gaiari buruz hitz egin ondoren ondorioztatu eta ikasi duena partekatuz.
• Bideoak eta azalpenak ongi ulertzeko gai izan da.
• Kutsadurari loturiko materialak arretaz eta gogoz landu ditu.
• Natura zaintzearen eta kutsadura ekiditearen garrantzia ulertu du.
• Erronka interesez eta era sortzailean gauzatu du. Material edo produktu baten sortze prozesua zuzentasunez jasoz eta aurkeztuz.